I dette prosjektet har vi rigga ein modell for samarbeid om eksisterande arbeidskraft gjennom ein inn- og utleigemodell av fagressursar etter behov. Denne modellen er utvikla i tett samarbeid med næringslivet, med ein primærintensjon om å verne om eksisterande arbeidskraft og førebyggje permitteringar. Modellen er kvalitetssikra i samarbeid med juridiske ressursar, Fellesforbundet, NHO, Norsk Industri og Konkurransetilsynet.

Prosjektet har og opna for eit sterkare fokus på rekruttering av framtidig arbeidskraft og promotering av regionen. Siste del av prosjektet har hatt eit spesielt fokus på nettopp dette. Samarbeid og samhandling med andre aktørar har vore sentralt i prosjektet frå start, ikkje minst i dette arbeidet. Prosjektet er no i ei sluttfase, og etterlet seg ein «arv» med konkrete planar og delmål, tilhøyrande materiale, kunnskap og verdifulle erfaringar som MAFOSS tek med seg i vidare arbeid.

Samarbeidspartar og støttespelarar er fylkeskommunen, Sparebanken Møre og fem kommunar på søre Sunnmøre, som frå ulike perspektiv ser at målsetjinga med prosjektet er samanfallande med eigne overordna mål og verdiar.

Skaparhuset samlar verkemiddelapparatet, skule og arbeidsliv til eit kreativt, utfordrande og spanande fellesskap. Skaparhuset held til i sentrum av Ulsteinvik og er arena for innovasjonsarbeid, undervisning, prosessarbeid, seminar, gründerverksemd og kopling mellom desse aktivitetane.

Skaparhuset er i stadig utvikling, og vi ser no fleire spanande prosjekt som vert utvikla i samarbeidet mellom næring og skule. I 2023 er særskilt Kongsberg Maritime aktive med eit realfagsprosjekt i samarbeid med Ulstein vidaregåande skule. Utfordringar frå næringa gir elevane gode praktiske døme på kva realfag kan nyttast til. Dette er sentralt for skulen, slik at dei kan knytte undervisning til noko konkret i bransjane rundt oss. Soleis skaper vi interesse for fag, samstundes som at dette er ein rekrutteringsplattform i seg sjølv.

Øvrige partnarar er ÅKP, Høgskulen i Volda, Ulstein kommune, Ulstein Næringsforum, NCE iKuben, Ulstein Vidaregåande skule, ProtoMore og Sparebanken Møre.

Les meir og kontakt gjerne ny dagleg leiar Monika Haanes Waagan via www.skaparhuset.no 

«MAFOSS skal vere ein uavhengig regional tilretteleggar som skal samle, forsterke, synleggjere og utfordre den verdsleiande maritime og marine klynga som medlemsbedriftene på Søre Sunnmøre er ein del av.»

Behova og måla til våre medlemsbedrifter er vår fremste drivar, og MAFOSS jobbar aktivt for saker som er forankra i strategiane til våre medlemmer. Det inneber mange ulike oppgåver, men dei viktigaste felles sakene i dag er arbeid for sikring og utvikling av utdanning og kompetanse, kamp for betring av samferdselstilbod via veg, luft og sjø, samt sikring av gode vilkår for ei næring som er svært viktig for regionen og AS Norge.

Dette betyr at MAFOSS har tett kontakt med politiske nivå frå lokalt, via regionalt til sentralt for å få auka forståing for utfordringane i industrien vi representerer.
Kontakten med politiske nivå er noko fleire driv med, men MAFOSS kan nok ha ei friare rolle enn fleire andre organisasjonar, sidan vi ikkje er bundne til sentrale avtalar og eigarskap.

MAFOSS jobbar godt saman med andre aktørar for å løfte enkelte bransjesaker inn til sentrale fora i tillegg til enkeltsamarbeid med andre interesseorganisasjonar frå sak til sak.

MAFOSS er aktivt med i EU-prosjektet «LeaderSHIP» der ein med aktørar frå fleire land i EU ser på korleis ein kan utvikle felles modellar og systematikk for etter- og vidareutdanning. Vi håper at ein gjennom dette arbeidet får sameina og heva fag-standardar innanfor skipsbygging i Europa. Samstundes er det ein glimrande arena for å sjå kva våre konkurrentar i EU har som fokus.

MAFOSS har også fått med Møre og Romsdal Fylkeskommune i dette samarbeidet. Fylkeskommunen og Kompetanse- og Næringsavdelinga er ein god og aktiv aktør for MAFOSS og er sentral for sikring av gode tilbod på yrkes- og fagskulane våre.

MAFOSS og utvala
MAFOSS er i dag også organisert med fleire utval/ arbeidsgrupper, der medlemsbedriftene sender sine fagfolk. Utvala femner fagområda Kompetanse og opplæring, HR/ Personal, Logistikk og produksjon, Helse miljø og sikkerheit (HMS) og Forsking og utvikling (FoU). Nokre meir aktive enn andre, men utvala har fokus på fagområder som medlemmene jobbar med til dagleg i sine respektive bedrifter, og representantane deler informasjon og erfaringar frå arbeidet med utvalet dei er med i. Slik utviklar vi oss i lag som bransje på fleire felt.
Styret for MAFOSS 2023-2024 er:

• Hans Jørgen Fedog, Green Yard Kleven, styreleiar
• Margrete Heltne Hovde, WATTN, nestleiar
• Jarle Gunnarstein, Larsnes Mek. Verkstad AS, styremedlem
• Tommy Fredriksen, Kongsberg Maritime, styremedlem
• Per Erik Dalen, ÅKP, styremedlem
• Lars Lühr Olsen, Ulstein verft, styremedlem
• Synnøve Ringstad Ingeberg, Amex GBT, styremedlem

MAFOSS og ÅKP
MAFOSS vart i 2020 formelt etablert som eit prosjekt i ÅKP, og skal saman med ÅKP arbeide for å løyse felles medlemsutfordringar og for å finne synergiar i felles målsettingar.

MAFOSS og GCE Blue Maritime Cluster
Samarbeid om felles mål og konkrete prosjekt. MAFOSS fekk vere medarrangør med GCE på mellom anna fagdag om «Energieffektivisering av dagens flåte» som vart gjennomført i Fosnavåg i haust. Det er særs utviklande å få samarbeide med dyktige GCE-medarbeidarar, og vi ser fram til fleire felles prosjekt i 2024.

MAFOSS og kreative næringar og innovative miljø
For MAFOSS er det viktig å ha gode koplingar til dei kreative næringane slik at nye talent innan til dømes reklame, film og medieproduksjon får etablere kontakt med vår bransje. Desse produserer gjerne saker for våre medlemsbedrifter, dei får jobb i ulike mediehus etter utdanninga, og er viktige for å fortelje historia vår i fleire kanalar og til nye brukarar. Arbeidet med etablering av program og opplegg for innovative miljø er også viktig i eit rekrutteringsperspektiv, og MAFOSS støttar difor ulike tiltak for dette. MAFOSS er på bakgrunn av dette engasjert i styret i Sunnmøre Kulturnæringshage (SKNH) og Norsk Innovasjonssenter (NIAS).

MAFOSS administrasjon
I 2023 består administrasjonen av dagleg leiar Jan Thormodsæter og prosjektleiar Jannike Tuvik Skarbø. Jannike er prosjektleiar for kompetanseprosjektet «Kompetanseutvikling Sunnmøre», kort kalla MAKOMP, som du kan lese meir om i ei anna sak her på sida.

Klyngeetablering og klare ambisjonar har vore der heilt frå 60-talet. Samarbeid var nøkkel alt då, og ein såg at ein måtte samlast for å få gjennomslag i saker som var viktige for næringa. Det var eit stort behov for betre utdanning, det var naudsynt med stadig påfyll av kompetanse, ein trengde betre infrastruktur for å kunne drive næring ute på kysten, og ein trengte god kontakt med politiske miljø og andre aktørar. Slik er det framleis, og arbeidsoppgåvene for MAFOSS er difor like aktuelle i dag.

Det var skipsbyggarne og verftseigarane sjølve som starta MAFOSS. I dag er nokre av desse borte, medan andre er blitt slått saman med større verksemder. På søre Sunnmøre er det i dag fire verft, og alle er medlemmer i MAFOSS:
Ulstein Group AS, Green Yard Kleven AS, Larsnes Mek. Verksted AS og Myklebust Verft AS.

I tillegg til verfta representerer MAFOSS dei fleste av verksemdene innan den maritime og marine leverandørindustrien på Søre Sunnmøre. Medlemsbedriftene utgjer soleis ei komplett verdikjede, frå idè og design, via utstyr og system, til bygging, samanstilling, testing og ferdigstilling. Dette er sjølve nøkkelen – at miljøet omfattar heile rekka av samarbeid som må til for å levere utstyr og skip i verdsklasse.

Idar Ulstein, som var første styreleiar i MAFOSS, sa tidleg at det som skal kjenneteikne oss som næring på søre er at vi «Samarbeider når vi kan og konkurrerer når vi må».
Dette er ein god regel for felles utvikling den dag i dag, og pregar på mange måtar det daglege arbeidet vårt.

– Eg gler meg over å vere leiar i MAFOSS. Vi har i dag mange og aktive medlemsbedrifter, og sakene vi får jobbe med for å legge optimalt til rette for at dei skal kunne drive konkurranse med resten av verda er ein motivasjonsfaktor for å stå på vidare.
Det må stadig jobbast for å sikre skuletilbod, legge til rette for samarbeid, fornye og utbetre alt av infrastruktur, og sparke våre politikarar litt på leggen når dei kjem ut av kurs. Samstundes må vi jobbe for å halde i gang gode nettverk og sørge for god informasjon til våre folkevalde slik at dei legg optimalt til rette for at vi skal kunne drive industrielt næringsliv på kysten.
Den jobben tek vi på høgste alvor, og eg gler meg over dagleg å få jobbe for ei framtidsretta og ambisiøs næring!